Wednesday, October 17, 2012

നിദ്രയുടെ കാമുകന്‍ *****************************

നിദ്രയുടെ കാമുകന്‍
*****************************


അവനെപ്പോഴും ഉറക്കത്തിലാണ്
പ്രഭാതത്തിലെ പുകച്ചുരുളുകള്‍ നീക്കി
കാറ്റ് ചൂളം വിളിച്ചു പായുന്ന
തിരക്കിട്ട നഗരത്തിന്റെ
നെഞ്ചകം തടവി
ചിറകു വെച്ച ശകടത്തില്‍
ഞങ്ങള്‍ പറന്നു പോകുമ്പോഴും
അവനുറക്കത്തിലാവും

സായാഹ്ന്നങ്ങളില്‍
ബിസ്മില്ലാഖാന്റെ ഷഹനായി
വിഷാദ രാഗങ്ങള്‍  തീര്‍ത്ത്‌ 
കരളു കവര്‍ന്നെടുക്കുമ്പോഴും
അവനൊന്നുമറിയാതെ
ഉറക്കത്തിലായിരിക്കും

നിശയുടെ അന്ത്യയാമങ്ങളില്‍ 
ഉറക്കം വരാതെ ഞങ്ങള്‍
പകലിനെ കുറ്റം പറയുന്ന
ചീവീടുകള്‍ക്കു കാതോര്‍ക്കുമ്പോഴും
നിദ്രയോട് പ്രണയാതുരനായി
ചുണ്ടില്‍ നിലാവിന്റെ മന്ദഹാസം പൊഴിച്ച്
നിറം ചാര്‍ത്തിയ അവന്റെ മുഖം

വറുതിയുടെ പെരുമഴ വീണു ചോരുന്ന
വര്‍ത്തമാന കാലത്തിന്റെ ചെറ്റക്കുടിലില്‍
തുള വീണ ഹൃദയപാത്രം തുറന്നു
തടയിടാന്‍ വ്യാമോഹിക്കുന്ന  ഞങ്ങള്‍ 

ഉറക്കം വെറും
വിദൂര സ്വപ്നമായി  തീരുന്ന നേരത്ത്
കദനത്തിന്റെ കഥകള്‍ പങ്കുവെക്കുമ്പോള്‍
ഉറങ്ങാന്‍ കഴിയുന്ന നീയെത്ര  ഭാഗ്യവാന്‍.!

2 comments:

Unknown said...

എത്ര മനോഹരമായ വരികളാണ് പള്ളിപ്രത്തിന്റെ കവിതകളെല്ലാം ...സസ്നേഹം എല്ലാ ഭാവുകങ്ങളും പ്രിയ കവിക്ക്‌

Shahid Ibrahim said...

നന്നായിട്ടുണ്ട് മാഷേ...